• (26-05-2012)
  - Xornada de Portas Abertas na Ruta do Viño Monterrei

Trátase da D.O. máis pequena de toda España. Con 450 ha. de territorio abrangue tan só catro concellos. Xeograficamente, atópase situada ao sueste da provincia de Ourense e moi preto da fronteira con Portugal. A súa proximidade á autovía das Rías Baixas, na mesma entrada de Galicia, pon a este territorio nunha situación con todas as vantaxes no que se refire a accesibilidade.

Esta Denominación abarca os concellos de Monterrei, Oímbra, Verín e Castrelo do Val, establecéndose dúas subzonas claramente diferenciadas:

Subzona Val de Monterrei.

Subzona Ladeira de Monterrei.

A Denominación de Orixe segue medrando ano a ano; de tal xeito que se vai aumentando tanto o número de produtores-viticultores como o de elaboradores-embotelladores. Na actualidade a produción total da D.O. rolda os 1,5 millóns de quilos de uva. O 65% da uva recollida é uva branca nas súas variedades de Godello, Treixadura e Dona Branca. O restante 35% é uva tinta das variedades Mencía, Bastardo e Arauxa (Tempranillo).

Os viños brancos son lixeiros, aromáticos, de cor amarela dourada ou pallosa, cunha graduación alcohólica media próxima aos 11 graos, plenos, saborosos, equilibrados en acedume e aceptable retrogusto. Mentres que os tintos se caracterizan por ter cor púrpura, agradable aroma a froitas, lixeiros e con bo equilibrio alcohol-acidez, con grao alcohólico algo inferior ao dos brancos e cun toque de xuventude que os fai apetitosos ao consumidor.